شہر دیاں گھڑیاں & ݙاکیا 

شہر دیاں گھڑیاں

ایں شہر دیاں گھڑیاں 

چالھی پنجاہ سال توں کھنیاں ہویاں

انہاں دی مرمت کیتے سݙیا، اساں

دوروں دوروں کاریگر

پہلے انہاں گھڑیاں دا موجد آیا

موجد کھڑ تے کھلیا

موجد کھڑ تے رُنیا

موجد ایں شہر وچ نچیا

موجد کوں اساں پھل پواۓ، ٻوہے تے ٻلہایا

گھڑیاں دا وپاری آیا

ٻوتھی اوندی کھڑکدیاں، ݙاہ ٻارھاں گھڑیاں

ڳل اندر گھڑیال  اوندا ٻدھیا ہویا وڄدا

وپاری ایں شہر وچ وݨڄیا

اساں اوندے ویلے کوں نہ وݨڄیا

اڳوں ہک کمشنر

گھنٹہ گھر دیاں برجیاں اُتے چڑھیا

کھنیاں ہویاں گھڑیاں دے دُنبیاں توں

ݙریا

کھنیاں ہویاں گھڑیاں دے ݙاندیں توں

ݙریا

تبادلہ کرایا، ایں شہر وچ

ول نہ آیا

اڳوں ہک مکینک آیا

اڳوں ہک فوٹو گرافر

اڳوں ہک کمانڈر

ایہہ شہر اپݨے ہک شاعر کوں چھیکڑی ہک

موقع پیا ݙیندا ہے

ݙاکیا

ݙوجھی وݙی جنگ

جے ݙاکیا نہ ہووے ہا تاں نہ مکے ہا

اتھاہیں پنج ٹالھیاں ہَن

جنہاں دے پتر محاذ تے پۓ لڑدے ہن

اتھاہیں پنج امب ہن

جنہاں دے پتر محاذ تے پۓ لڑدے ہن

ٹالھیاں، پتریں کوں خط لکھیا

جنگ کݙݨ مکسی

امبیں، پتریں کوں خط لکھیا

جنگ کݙݨ مکسی

ٹالھیاں کوں محاذ توں خط آیا

جنگ جلدی مک ویسی

امبیں کوں محاذ توں خط آیا

جنگ جلدی مک ویسی

Illustration by Usman Ibrahim