ආකාස කඩේ බෝම්බය & කොළඹට එරෙහිව

ආකාස කඩේ බෝම්බය

ලෝ යදමින් නිදහස් වී

අහස උසින් පිහාටුවක

සැප සිටුවර පුටුව තබා

තොළ ගානා විට මධුවිත

කොටි වට කර මගෙ සිහිනය

වෙඩි තබනා සැටි දුටුවෙමි

දැරියක සේ නිරුවත් වී

නාගසාකි මහ පාරේ

මගෙ සිහිනය දිව යන කල

අරගත් පින්තූර රැසක්

බීබීසී නිව්ස් ලෙසින්

පත්තර පිටුවල පළ විය

යුද ගිනිදැල් නිවුණු පසුව

මගේ සිහින අවතාරය

යටි පතුලේ සිට ම වෙළා

මොඩර්න් ආර්ට් මූර්තියක්

විලස තනා කලාභවන

මැද සිටුවා මළකඩ කෑ

එන්නත් කටු ගසා තිබිණ

සුවපත් වුණු මගෙ සිහිනය

අහිමි දෙපා ගැන සිතමින්

රෝද පුටුව මත සැතපී

අහස අඳුරු නැති දිනවල

වලා අතර සුදට පෙනෙන

හෙද සඳ දෙස බලා සිටියි

කොළඹට එරෙහිව

රකුසු කිපුණු ලෙස

ඉර විත් ළඟටම

ඇරලා කවුළුව

පියන දෙපළු කර

රැස් නිය පහරින්

පහරා ඇසි පිය

බලවයි දෙඇසින්

පොරවා කඩමලු

තවමත් නිදියන

කම්බිලි නගරය

බිලිඳෙකු කෑදෙත

පදික තොටිල්ලක

කිරිපිටි විකුණන

කොම්පැනි එළදෙන

ඔබයි සූප්පුව

වෙසඟන දරු මුව

සරතැස දහවල

නිවනා සාගර

පංකා පහරේ

සතුටට ඉගිළෙති

ඔසවා අත්තටු

පරෙවි රෑන් උඩ

ඔල්කට් පාමුල

දින සිය ගණනක්

උපවාසය කළ

කම්කරු ඇස්වල

ලියවෙයි වැරදුණු

සටනක ඉරණම

කල්ගිය ජාතික

ඇඳුමට ගැළපෙන

නේරු ජටා හිස

දරමින් ඇවිදින

කොටුවේ කිවිඳෙක්

විකුණයි කවි කොළ

අල්ලා බොටුවෙන්

කොටුවේ මැරයන්

නඩුවට ගෙනයන

රථයෙන් යන්නෙමි

කොළඹට එදිරිව

නඩුවක් කියනට

Return to the collection

Illustration by Tahira Rifath