جے میں کدی سوچن بیٹھاں تے پیو واقعی بڑے عظیم ہوندے نیں۔ ساری حیاتی اپنے جسم دا بالن بال کے دھوپ تےکورے وچ اپنی روح ساڑ کے اپنے ٹبر دا پیٹ پالدے نے۔پر کسے نہ کسے اورے اوہ وی عام انساناں والگوں خودغرض تے جھوٹے ہو جاندے نیں۔
جدوں میں نکی جئی ساں جدوں وی پنڈ جوں کوئی رشتے دار ساڈے گھر شہر آؤندا تے باجی شہناز دے اپنے پیو یعنیکے ساڈے ماسٹر نال ماڑے سلوک دا بڑا ذکر کردا۔ پنڈ وچ اوہناں دے گھر دو تین مجاں، کجھ مرغیاں تے کوئی دودرجن بکریاں ہوندیاں سن، نال ساڈا ماسٹر منجی تے پیا ہوندا تے باجی شہناز گھر دے کماں وچ لگی ہوندی۔ ماسیساڈی بڑے ورہیاں بہلاں اللہ نوں پیاری ہو گئی سی۔
ساڈے پنڈ والے رشتے دار کہندے کہ جدوں وی ویکھو باجی شہناز ماسٹر دے سر وچ جوتیاں مارن لگ پیندی اے یا فراوہنوں گھروں کڈھ دیندی اے تے اوہ غریب گھر دے دروازے تے بیٹھ کہ روہندا ہویا ماسی نوں یاد کردا اے۔ پنڈ والےترس کھا کہ ماسٹر نوں پانی ٹکر دے جاندے نے کوئی نہ کوئی ہمت کر کے باجی شہناز نوں مناون دی کوشش کردا۔ دلکرے تے باجی من جاندی سئیں تے اوس بندے دے گلے پہ جاندی۔
اسی سارے ایس گال توں بڑے پریشان رہندے تے ہر دو ترے مہینے بعد ماسٹر ہوراں نوں کہندے کہ اوہ ساڈے کول آکہ شہر رہوے۔ پر ماسٹر وی اپنی ضد دا پکا سی، اوہنے وی مردے دم تک اپنا گھر نئیں چھڈیا۔
ساڈے ابو کہندے کہ باجی دی شادی ایس کر کے نئیں ہوئی کیوں کہ ماسٹر غریب سی۔ پر جے لوکاں دی سنئیے تےماسٹر باجی دی شادی کرنا ای نئیں سی چاہندا۔ جدوں وی کوئی رشتہ آوندا ماسٹر آون والیاں نوں گالاں کڈن لگ پیندا، ہور نئیں تے باجی تے ماسی دے پاسے سینک دیندا۔ ڈر دے مارے لوکاں نے رشتہ پجھنا چھڈ دتا۔ تے باجی جہیڑیرنگ برنگے کپڑے تے پراندے پاؤندی سی ہولی ہولی بے رنگ تے چپ جئی ہو گئی۔
جدوں ماسی دنیا توں تڑ گئی تے بڑے لوکاں نے ماسٹر نوں اکھیا کہ ہن ہر صورت وچ باجی دا ویاہ کر دے۔ماسٹر ایہہگل سن دی بجائے الٹا باجی نوں کٹ دا تے گلاں کڈھدا کیوں کہ اوہدے خیال وچ باجی باجی منحوس سی کیوں کہ باجیتوں بعد ماسٹر ہوناں گھر کوئی اولاد نئیں جمی۔ لوگ کہندے کہ ماسٹر ایس گل توں ڈر دا الیہ کہ جے اوہ کلی کلی دھیدا ویاہ کر دیوے تے ساریاں مجاں بکریاں مرغاں تے گھر دی زمین اودے داماد نوں ملے گی.تے او بیگانہ بندہ ہورےماسٹر دا آخری عمر وچ خیال رکھے یا نہ رکھے۔
اسی سارے پہلے اپنی پڑھائیاں وچ تے فیر شادی کر کے اپنے گھراں وچ مصروف ہوگئے تے ایس قصے نوں بھلگئے. کل بڑے ورہیاں بعد پنڈ دی اک سہیلی نے فیس بک تے دوستی دا پیغام پھیجیا جہیڑا میں بڑی خوش ہو کہ قبولکیتا. گلاں گلاں وچ او کہن لگی کہ تسی تے لگدا ہن شرم دے مارے پینڈ نئیں آؤندے. میں کیوں کہ ویاہ کروا کہ ولایتآگئ سی تے ایہناں گلاں تو بے خبر سی بڑا حیران ہو کے پچھیا کہ شرم کس گل دی۔
میری سہیلی آکھدی کہ تواڈی باجی شہناز نے گھروں نس کے ہینڈ دے گورکن نال شادی کر لئ اے تے اودے نالقبرستان اچ آج چھوٹے جئے کمرے وچ ریندی اے. نال او دسدی اے کہ جدوں ماسٹر دا آخری ویلا آیا۔ باجی شہنازاوہنوں ملن واسطے وی نہیں آئی. ہور تے ہور اونے کہہ دتا اے کہ ماسٹر واسطے پنڈ دے قبرستان وچ کوئ جگہ نہیں.. ماسٹر اپنے ویہڑے وچ اک راتی کلا ای مرگیا تے پنڈ والیاں اوہنوں اودے گھر دے وہیڑے وچ ای دفنا دتا. تے جے کوئی دور دا رشتے دار ہن ماسٹر دا گھر ویچن دی کوشش کرے تے گاہک الیہ سن کے پچھے ہٹ جاندے نیں کہ گھردے وچوں وچ اک قبر اے۔
Illustration by Madhri Samaranayake
Subscribe for new writing
Sign up to receive new pieces of writing as soon as they are published as well as information on competitions, creative grants and more.